Llapi kërkon sqarime nga FFK për anulimin e tre golave

Klubi i futbollit Llapi ka reaguar zyrtarisht ndaj vendimeve të gjyqtarëve në tri ndeshjet e fundit, duke shprehur pakënaqësinë për anulimin e tre golave në përballjet me Feronikelit 74, Prishtinën dhe Dukagjinin. Sipas të dhënave nga klubi i Podujevës, në qendër të shqetësimit është trajtimi i episodeve të debatueshme dhe mënyra e menaxhimit të situatave ku gjyqtarët kanë në dispozicion sistemin VAR.

Në reagimin e publikuar, klubi llapjan ka rikujtuar rastin e ndeshjes kundër Prishtinës, ku goli i shënuar nga Fiton Ademi u anulua për një faull të pretenduar në sulm, ndërsa pamjet që posedon klubi nuk tregojnë kontakt me mbrojtësin kundërshtar, siç bën të ditur Llapi. Një situatë e ngjashme është theksuar edhe për përballjen e fundit në Klinë ndaj Dukagjinit, ku arbitri ndali lojën për një faull ndaj portierit para se topi të hynte në rrjetë, duke mos e lënë aksionin të përfundonte që të verifikohej përmes sistemit VAR. Për më tepër, kundërshtime janë paraqitur edhe për golin e anuluar kundër Feronikelit 74 për shkak të prekjes së topit me dorë nga Gentrit Jaha, për të cilën klubi thotë se ishte e pavullnetshme dhe se topi kishte mbërritur pas një devijimi nga kundërshtari.

Për të tria këto raste, klubi i Llapit kërkon nga organet e arbitrimit në Federatën e Futbollit të Kosovës një shqyrtim serioz dhe shpjegime të qarta mbi vendimet e marra. Përmes kësaj kërkese, klubi synon transparencë dhe një vlerësim të drejtë të rasteve që, sipas tij, kanë shkaktuar shqetësime të vazhdueshme rreth drejtësisë në fushë.