Pse akuzon Lista Serbe Rashiqin për 'inxhinieri politike'?
Zllatan Ellek thotë se partia e tij mori 42.166 vota në zona serbe, ndërsa akuzon Nenad Rashiqin për vota në zona shqiptare.
PRISHTINË — Kryetari i Listës Serbe, Zllatan Ellek, ka deklaruar se partia e tij ka fituar rreth 42.166 vota në zonat ku jeton komuniteti serb në Kosovë, duke pretenduar 10 mandate të rezervuara për këtë komunitet.
Ellek ka akuzuar Partinë për Liri, Drejtësi dhe Mbijetesë të Nenad Rashiqit se ka marrë vota në zona ku nuk jeton komuniteti serb, duke përmendur Gjakovën, Suharekën dhe Mitrovicën e Jugut si shembuj. “Lista Serbe fitoi të dhjetë vendet [e rezervuara për komunitetin serb] në zonat serbe... ne po marrim rezultate nga zonat shqiptare”, ka thënë ai.
Zyrtari i Listës Serbe, Igor Simiq, ka deklaruar për mediat në Beograd se Rashiq i ka “marrë” një mandat Listës Serbe me votat e shqiptarëve. “Po vidhet sërish një mandat i popullit serb”, ka thënë Simiq.
Sipas të dhënave të Komisionit Qendror të Zgjedhjeve me rreth 98 për qind të votave të numëruara, Lista Serbe ka marrë rreth 40.000 vota (5.89 për qind), ndërsa partia e Rashiqit rreth 5.000 vota (0.73 për qind). Në zgjedhjet e dhjetorit 2025, Lista Serbe fitoi nëntë nga dhjetë mandatet e rezervuara.
Burim: Zëri
— Redaksia ZHURMA