Lëvizja Revolta aksion para Qeverisë për uniformat e Policisë së Kosovës

Lëvizja Revolta ka zhvilluar një aksion simbolik para objektit të Qeverisë së Kosovës për të protestuar ndaj mungesës së uniformave për zyrtarët e rinj policorë. Aktivistët kanë vendosur pranë ndërtesës qeveritare një fotografi të një polici me fytyrën e ministrit të Punëve të Brendshme, Xhelal Sveçla, të shoqëruar me pyetjen se kush i hëngri kapelat.

Shtyrja e ceremonisë së diplomimit për gjeneratën e 63-të të Policisë së Kosovës ndodhi pasi aktivitetet e parapara për datën 1 nëntor u shtynë për më 6 nëntor. Sipas Lëvizjes Revolta, ministria nuk kishte arritur të siguronte kapelat e nevojshme për zyrtarët e rinj në datën e parë të caktuar. Ndërkohë, tenderët për uniformat e policisë kanë dështuar që nga viti 2021, sipas sindikatës.

Gjatë aksionit para Qeverisë, aktivistët ngritën gjithashtu një diplomë simbolike për policët e rinj. Lëvizja Revolta njoftoi se me këtë gjest ka dashur të vërë në pah mungesën e uniformave, mungesën e kushteve dinjitoze të punës, si dhe mungesën e sigurimit shëndetësor e të punës për pjesëtarët e rinj. Sipas njoftimit të lëvizjes, vonesa pesëditore u shfrytëzua për të huazuar kapelet e vjetra nga policët që janë me shërbim aktiv, në mënyrë që të zhvillohej ceremonia.

Ceremonia e diplomimit të gjeneratës së 63-të të Policisë së Kosovës është caktuar të mbahet sot në orën 16:30.

Në njoftimin e saj për mediat, Lëvizja Revolta deklaroi: «Për gjeneratën e 63-të të Policisë së Kosovës, sot do të ishte dita e pestë e punës, por fatkeqësisht Ministria nuk arriti t’i sigurojë kapelat për diplomim me 1 nëntor, prandaj e shtyu ceremoninë për 6 nëntor. Jo sepse me 6 nëntor do të vinin kapelat e reja, por sepse brenda pesë ditësh arritën të siguronin huazimin e kapelave të vjetra të policëve në detyrë, deri në përfundimin e ceremonisë».