Kush kërkon zgjedhje të brendshme në LDK?

PRISHTINË — Anëtari i Kryesisë së Lidhjes Demokratike të Kosovës, Armend Zemaj, ka deklaruar se tashmë janë mbledhur më shumë se 150 nënshkrime për thirrjen e një Kuvendi të jashtëzakonshëm të LDK-së, raporton Ekonomia Online.

Pas mbledhjes së Kryesisë së LDK-së, Zemaj tha se kërkesa ka ardhur nga strukturat e partisë në nivel lokal dhe qendror. Ai theksoi se dega nga e cila vjen ka dhënë mendim unanim që duhet të ketë zgjedhje të parakohshme dhe reflektim 'në të gjitha strukturat e Lidhjes Demokratike, duke filluar nga kryetari edhe deri te anëtarët'.

Zemaj shtoi se nuk ka njohuri nëse nënshkrimet janë deponuar zyrtarisht, por konfirmoi se çështja u debatua 'me seriozitetin më të madh' në mbledhje, ku u shprehën mendime për shmangien e zgjedhjeve të parakohshme që i parasheh statuti, por edhe për t'i dhënë përkrahje kryetarit të LDK-së.

Sa i përket mungesës së disa figurave të LDK-së në mbledhjen e Kryesisë, Zemaj përmendi qëndrimin e Avdullah Hotit, i cili ka thënë publikisht se nuk merr pjesë në atë që e quan 'kryesi jostatutare'. Për Hykmete Bajramin ai tha se nuk e di arsyen e mungesës. Të tjerë të munguar, sipas Zemajt, ishin deputetë që nuk janë anëtarë të Kryesisë.

Burim: Ekonomia Online, https://ekonomiaonline.com/zemaj-jo-vec-qe-e-kam-nenshkruar-kerkesen-per-zgjedhje-te-brendshme-ne-ldk-por-jane-mbi-150-sosh/
— Redaksia ZHURMA