Kush qëndron pas këmbimit valutor pa licencë në Berat?
Hetimi gjashtëmujor i Prokurorisë përfshiu pesë bashki të Beratit dhe zbuloi gjashtë biznese që përdornin emrin e UnionNet dhe Western Union pa licencë.
BERAT — Prokuroria e Beratit ka kërkuar masat e sigurimit "Arrest në shtëpi" dhe "Detyrim për t'u paraqitur në policinë gjyqësore" për 11 persona me inicialet S.T., H.S., M.M., S.H., S.C., A.H., A.S., O.V., Z.M., E.T. dhe K.P., të dyshuar se administronin gjashtë subjekte tregtare që kryenin këmbim valutor pa licencë.
Hetimi proaktiv i Prokurorisë zgjati rreth gjashtë muaj dhe u shtri në pesë bashki të qarkut Berat. Ai dokumentoi se administratorët dhe punonjësit e gjashtë subjekteve tregtare në Berat dhe Kuçovë kryenin këmbim valutor pa autorizimin e organeve kompetente dhe pa licencë të lëshuar nga Banka e Shqipërisë.
Sipas Prokurorisë, të hetuarit administronin biznese të regjistruara si agjentë për transfertat e parave në emër të institucioneve financiare jobankare, duke ofruar shërbime si UnionNet dhe Western Union në Berat dhe Kuçovë. Subjektet nuk figuronin në listën e zyrave të licencuara për këmbim valutor.
Për të dokumentuar veprimtarinë, Prokuroria autorizoi kryerjen e veprimeve stimuluese dhe regjistrimeve të fshehta fotografike e filmike. Gjatë hetimit u realizuan 28 transaksione testuese të këmbimit valutor, të cilat, sipas organit të akuzës, provuan se aktiviteti kryhej pa licencën e kërkuar.
Gjatë kontrolleve u sekuestruan rreth 88 milionë lekë, 118 mijë euro, 7,390 dollarë amerikanë dhe 665 paund britanikë. Prokuroria bazoi kërkesën e saj mbi 28 transaksionet testuese dhe regjistrimet e fshehta të realizuara gjatë hetimit gjashtëmujor.
Burim: Politiko
— Redaksia ZHURMA