Kush ia hap derën Kurtit për të zgjidhur krizën?

PRISHTINË — Pas ftesës së drejtuar opozitës, Albin Kurti mori përgjigjet e para. Bedri Hamza, kryetar i PDK-së, dhe Lumir Abdixhiku, kryetar i LDK-së, konfirmuan se do t'i përgjigjen ftesës për takim, duke lënë të hapur mundësinë që dialogu të shërbejë si hapi i parë drejt zhbllokimit të krizës institucionale. Ardian Gjini, kryetar i AAK-së, refuzoi takimin.

PDK-ja do të jetë e para që ulet përballë Kurtit: Hamza deklaroi se partia është e gatshme të takohet të premtën në orën 09:00 në ambientet e Kuvendit. Edhe LDK-ja ka vendosur të hyjë në proces, megjithëse me rezervat e saj.

Abdixhiku e sheh takimin vetëm si një hap fillestar, duke bërë të qartë se zgjidhjet nuk mund të arrihen përmes takimeve të izoluara. Ai zbuloi se Vetëvendosje kishte propozuar formatin 1+1 (kokë më kokë), por LDK-ja preferon formatin 2+2, me bashkëpunëtorët e saj në tavolinë. "Do të provoj të takohem edhe me liderët e partive politike", deklaroi ai, duke lënë të kuptohet se fillimisht pret të dëgjojë ofertën e palës tjetër.

AAK vazhdon të kërkojë plotësimin e gjashtë kushteve të vendosura më herët si parakusht për mbështetjen e procesit të zgjedhjes së presidentit. Gjini tha se nuk sheh arsye për takim të ri me Kurtin, pasi pozicioni i partisë nuk ka ndryshuar.

Burim: Gazeta Metro
— Redaksia ZHURMA