Kush e sjell sot Lord Bajronin në skenën e Londrës?
Robert Wilton sjell në skenë Lord Bajronin, ndërsa Ansambli Kombëtar i Këngëve e Valleve Popullore kthehet në Londër për herë të parë pas komunizmit.
LONDËR — Sot, më 6 korrik, në Shaw Theatre të Londrës ngjitet në skenë produksioni etno-muzikor "Shqipëria përmes syve të Bajronit". Robert Wilton interpreton rolin e Lord Bajronit, poetit romantik që përjetësoi Shqipërinë si vend i lirisë, nderit, mikpritjes dhe dinjitetit njerëzor.
Frymëzuar nga "Shtegtimet e Çajld Haroldit" (Kanto II), spektakli ndërton një dialog artistik mes historisë, poezisë, muzikës dhe vallës. Publiku udhëhiqet në një udhëtim në Shqipërinë e fillimshekullit XIX, ashtu siç e pa dhe e përjetësoi Bajroni.
Ansambli Kombëtar i Këngëve dhe Valleve Popullore kthehet në Londër për herë të parë pas rënies së komunizmit, teksa performon në Shaw Theatre në orën 19:00. Pjesëmarrja e këtij institucioni shtetëror është bërë e mundur falë mbështetjes së Agjencisë Kombëtare të Diasporës (AKD), duke i dhënë ngjarjes një rëndësi artistike, kulturore dhe institucionale.
Organizuar nga Empowered Women of Diaspora, në partneritet me British Albanian Youth & Culture, "Shqipëria përmes syve të Bajronit" përfaqëson një urë të rëndësishme kulturore mes Shqipërisë dhe Mbretërisë së Bashkuar, ku letërsia, historia, muzika dhe identiteti kombëtar bashkohen përmes figurës së pavdekshme të Lord Bajronit.
Burim: KultPlus
— Redaksia ZHURMA
Bisedoni
Komentet janë të hapura për anëtarët e Zhurma. Llogaria është falas — krijo një ose hyr në llogarinë tënde për me e thanë mendimin.