Kurti thotë se njohja e Kosovës nga Ukraina demaskon blofin e Putinit
Albin Kurti argumenton në një opinion për Kyiv Post se pavarësia e Kosovës ndryshon nga aneksimi i Krimesë dhe fton Volodymyr Zelensky-n për njohje.
Redaksia ZHURMA · · 4 min lexim
Kryeministri i Kosovës, Albin Kurti, i ka bërë thirrje presidentit të Ukrainës, Volodymyr Zelensky, për ta njohur pavarësinë e Kosovës, duke argumentuar se një hap i tillë do të demaskonte blofin e presidentit rus, Vladimir Putin, i cili e përdor rastin e Kosovës për të arsyetuar aneksimin e Krimesë nga Rusia.
Në një opinion të publikuar në median ukrainase Kyiv Post, Kurti kritikoi qëndrimin zyrtar të Ukrainës për mosnjohje, duke theksuar se Zelensky e kishte përsëritur këtë pozicion gjatë një deklarate në Beograd në gusht të këtij viti. Më parë, Kurti i pat kërkuar publikisht Ukrainës njohjen e shtetësisë, duke vënë në dukje se Kosova ka mbështetur vazhdimisht Ukrainën përballë agresionit ushtarak të Moskës përmes zbatimit të sanksioneve të SHBA-së e BE-së, strehimit të gazetarëve ukrainas si dhe ofrimit të trajnimeve dhe ndihmës ushtarake.
Sipas kryeministrit të Kosovës, përpjekja e udhëheqësit rus për të krahasuar Kosovën me Krimenë synon vetëm diskreditimin e Perëndimit dhe paraqitjen e rasteve krejtësisht të ndryshme si identike. Kurti sqaroi se pavarësia e Kosovës rrodhi nga një proces i gjatë i përbërë nga shtypja e shqiptarëve, lufta çlirimtare, spastrimi etnik, ndërhyrja ushtarake e NATO-s, administrimi ndërkombëtar dhe bisedimet diplomatike. Ai rikujtoi se Gjykata Ndërkombëtare e Drejtësisë konstatoi në opinionin këshillëdhënës të vitit 2010 se shpallja e pavarësisë së Kosovës nuk e ka shkelur të drejtën ndërkombëtare.
Më tej, ai nëvizoi se ndryshimi i kufijve me forcë ushtarake dhe tanke nuk mund të barazohet kurrsesi me të drejtën e vetëvendosjes së një populli, duke sqaruar se ky parim ka rëndësi edhe për shtetet e tjera që hezitojnë ta njohin Kosovën për shkak të kontesteve të tyre territoriale.
«Në gushtin e kaluar, presidenti Volodymyr Zelensky deklaroi se qëndrimi i Ukrainës ndaj Kosovës, përkatësisht mosnjohja e saj, mbetet i pandryshuar. Ajo që ra në sy ishte fakti se kjo deklaratë u bë në Beograd, kryeqytetin e Serbisë, një prej aleatëve më të afërt të Rusisë. Kosova, nga ana tjetër, e ka ruajtur edhe qëndrimin e saj ndaj Ukrainës: atë të mbështetjes. Ne e kemi dënuar agresionin e Moskës, jemi rreshtuar me sanksionet e SHBA-së dhe Bashkimit Evropian, kemi strehuar gazetarë ukrainas dhe kemi kontribuar me ndihmë dhe trajnime ushtarake», shkroi Kurti.
Kreu i qeverisë shtoi se njohja e shtetësisë do të rrëzonte pretendimet e Rusisë. «Gabimi qëndron në trajtimin e të gjitha pretendimeve për vetëvendosje sikur të ishin të këmbyeshme nga pikëpamja juridike dhe politike. Ato nuk janë të tilla. Njohja e Kosovës nuk krijon një rregull automatik për çdo kontest tjetër territorial. Secili rast duhet të vlerësohet mbi bazën e historisë së vet, fakteve të veta dhe, çka është thelbësore, veprimeve konkrete të shteteve të përfshira», deklaroi ai.
Kurti përfundoi se pushtimi ushtarak ndryshon rrënjësisht nga pavarësia. «Njohja do ta hidhte poshtë pretendimin e Putinit se Kosova është dëshmi se demokracitë perëndimore nuk respektojnë ligjin. Ajo do ta refuzonte përpjekjen e tij për t’i futur rastet e ndryshme në të njëjtin kallëp, për t’i shërbyer një argumenti të leverdishëm për të. Ndryshimi i kufijve përmes tankeve të një fuqie të madhe nuk është i njëjtë me një status të arritur pas një lufte çlirimtare, administrimi ndërkombëtar dhe diplomacie. Pushtimi nuk është vetëvendosje. Aneksimi nuk është pavarësi. Kutitë e votimit në referendum nuk duhet të barten nga ushtarët e një shteti fqinj, ashtu siç bënë ushtarët rusë në Krime. Vetëvendosja është e drejtë e një populli për të vendosur për veten, një akt çlirimi në kërkim të barazisë dhe lirisë, demokracisë emancipuese dhe pavarësisë së vërtetë, e jo zgjerim apo shtrirje e një shteti tjetër në funksion të ambicieve të tij hegjemoniste. Kjo ka rëndësi jo vetëm për Ukrainën, por për çdo vend që heziton ta njohë Kosovën nga frika se çfarë mund të nënkuptojë kjo për kontestet e veta territoriale», u shpreh ai.
Pyetje e përgjigje
Përse i bëri thirrje Albin Kurti presidentit Volodymyr Zelensky?
Kryeministri Albin Kurti i kërkoi presidentit ukrainas ta njohë pavarësinë e Kosovës për të demaskuar argumentet e Vladimir Putinit, i cili përdor rastin e Kosovës për të arsyetuar aneksimin e Krimesë.
Ku i publikoi Albin Kurti qëndrimet e tij për Ukrainën?
Kryeministri i Kosovës i shprehu argumentet e tij përmes një opinioni të shkruar për median ukrainase Kyiv Post.
Çfarë vendimi kishte marrë Gjykata Ndërkombëtare e Drejtësisë për Kosovën?
Gjykata Ndërkombëtare e Drejtësisë konstatoi në opinionin këshillëdhënës të vitit 2010 se shpallja e pavarësisë së Kosovës nuk e ka shkelur të drejtën ndërkombëtare.
Lexo edhe
Më shumë →Koleksione · të dhëna të verifikuara
Vazhdo me më të lexuarat sot
Përditësuar