Kurti: Partneriteti me Francën po sjell rezultate konkrete

Kryeministri Albin Kurti u takua me ministrin francez të deleguar për Evropën, Benjamin Haddad, në kuadër të Samitit të Procesit të Berlinit që po zhvillohet në Mal të Zi. Takimi u mbajt në Shën Stefan, si paraprijës i vizitës së kryeministrit në Paris për Forumin e Paqes në nëntor, ndërsa pasoi vizitën e zyrtarit francez në Prishtinë në korrik.

«Partneriteti me Francën po sjell rezultate konkrete dhe po hap mundësi të reja për bashkëpunim», tha Kurti, duke shtuar se pas nënshkrimit të pesë marrëveshjeve dhe instrumenteve gjatë vizitës në Kosovë, puna është përqendruar në zbatimin e tyre për fushën e drejtësisë, arsimit dhe sportit. Ai veçoi se ratifikimi i kredisë prej 60 milionë eurosh nga Kuvendi për infrastrukturën e Lojërave Mesdhetare 2030 përbën dëshmi të këtij bashkëpunimi.

Gjatë bisedës u trajtuan edhe dinamikat politike në rajonin e Ballkanit Perëndimor. Atje u vu theksi te lidhja mes paqes, sigurisë, demokracisë, sundimit të ligjit dhe integrimit evropian, ndërsa u theksua mbështetja e Francës për anëtarësimin e Kosovës në Këshillin e Evropës dhe në Bashkimin Evropian.