Kurti: Janë kthyer 171 mjekë; Oda e Mjekëve: Vetëm 40 për 8 vjet

Oda e Mjekëve të Kosovës ka demantuar deklaratat e kryeministrit Albin Kurti se gjatë vitit të kaluar janë kthyer 171 mjekë në vend, duke njoftuar se në periudhën 2018–2026 janë kthyer rreth 40 mjekë dhe se aktualisht janë gjithsej 521 mjekë të papunë në Kosovë.

Ky zhvillim vjen pas deklarimeve të bëra nga kreu i ekzekutivit për kthimin e profesionistëve shëndetësorë, të cilat kanë ngjallur reagime dhe kërkesa të ndryshme nga opozita për publikimin e emrave të saktë të personave të punësuar në sistemin publik shëndetësor.

Në një përgjigje për mediat, Oda e Mjekëve të Kosovës ka bërë të ditur se rreth 40 mjekë janë pajisur me Certifikatën e së Kaluarës Etike dhe Profesionale gjatë viteve 2018–2026, pasi kishin ushtruar veprimtarinë jashtë vendit, ndërsa tani janë ri-anëtarësuar dhe rilicencuar, me shumicën e tyre që punojnë në sektorin privat, siç thekson OMK.

Sipas të dhënave të paraqitura nga Oda e Mjekëve të Kosovës, numri i përgjithshëm i certifikatave të lëshuara që shërbejnë si bazë për largimin e mjekëve drejt huajsisë ka arritur në 1181 gjatë periudhës 2018–2026, ndërsa bazuar në vetëdeklarime, rreth 600 mjekë janë të punësuar vetëm në Gjermani.

Për më tepër, lidhur me pjesën tjetër të mjekëve që pretendohet se janë kthyer, Oda e Mjekëve të Kosovës ka udhëzuar që të kërkohen sqarime nga Ministria e Shëndetësisë, duke sqaruar se mund të bëhet fjalë edhe për shtetas të huaj të licensuar nga ky dikaster qeveritar.

Lidhur me statusin e specializantëve, Oda e Mjekëve të Kosovës ka deklaruar se nuk rezulton të ketë specializantë të papunë, pasi vetë procesi i specializimit nënkupton angazhimin e tyre të vazhdueshëm në avancimin e mëtejshëm profesional.

Deklarimet e kryeministrit janë kontestuar edhe në rrafshin politik, ku deputeti i LDK-së, Armend Zemaj, i ka kërkuar atij që të ofrojë të paktën 17 emra të mjekëve specialistë që janë kthyer nga mërgata dhe janë punësuar rregullisht gjatë vitit 2025.