Partitë shqiptare në Serbi garojnë së bashku, Kamberi synon tri mandate
Subjektet politike shqiptare në Luginë bashkohen për zgjedhjet që mbahen pas një jave, me synimin për të siguruar tre ulëse në parlament.
Redaksia ZHURMA · · 1 min lexim
Partitë politike shqiptare në Serbi janë bërë bashkë për të garuar së bashku në zgjedhjet që do të mbahen pas një jave. Bartësi i listës shqiptare në Luginë, Shaip Kamberi, gjatë një paraqitjeje televizive në emisionin «Info Magazine», bëri të ditur se ky bashkim synon arritjen e tre mandateve të deputetit.
Kamberi sqaroi se vendimi për të dalë me listë të përbashkët buron nga vlerësimi i potencialit që zotëron secila forcë politike veç e veç. Sipas tij, ky synim mbështetet në rezultatet e deritanishme të zgjedhjeve lokale dhe mbështetet mbi baza konkrete. «Është një vendim që është marrë nga partitë politike shqiptare për të garuar bashkërisht në këto zgjedhje, duke u nisur nga potenciali që e posedon secila parti, duke pasur parasysh rezultatet e zgjedhjeve lokale të secilit prej tyre, dhe është e bazuar në rezultate konkrete që ne të synojmë tre mandate deputeti», u shpreh ai.
