KRU “Prishtina”: Ndërprerja e rrymës lë pa ujë disa zona

PRISHTINË — Kompania Rajonale e Ujësjellësit “Prishtina” ka njoftuar se disa zona do të përballen me mungesë të furnizimit me ujë për shkak të ndërprerjes së energjisë elektrike. Sipas njoftimit, ndërprerja e rrymës nga KOSTT/KEK-u në zonën e Banullës dhe Konjuhit, ku ndodhet stacioni i pompimit të KRU-së, ka bërë që pompat të dalin jashtë funksionit.

Si pasojë e kësaj situate, pa ujë të pijshëm do të mbesin konsumatorët në zonën e QMI-së, Janjevës me rrethinë, si dhe Gadimes me rrethinë. KRU “Prishtina” ka bërë të ditur se për momentin ende nuk ka informacione lidhur me arsyen e ndërprerjes së energjisë elektrike, ndërsa ka njoftuar se sapo të ketë informacione të reja dhe të rikthehet furnizimi, konsumatorët do të njoftohen me kohë.