KPK: Kandidatët i nënshtrohen testit kualifikues për prokurorë të rinj

Këshilli Prokurorial i Kosovës ka mbajtur testin kualifikues për 371 kandidatë që kanë aplikuar për rekrutimin e 34 prokurorëve të rinj të shtetit, ku 174 ishin gra dhe 197 burra. Nga totali i pozitave të shpallura, 10 janë të rezervuara për pjesëtarët e komunitetit serb, ndërsa prokurorët e rinj pritet të emërohen në prokuroritë themelore të vendit. Testimi është zhvilluar në ambientet e Akademisë së Kosovës për Siguri Publike në Vushtrri dhe është mbikëqyrur nga Arian Gashi, në cilësinë e kryetarit të Komisionit për Rekrutimin e Prokurorëve të Shtetit, bashkë me anëtarët e tjerë të këtij komisioni.

Sipas njoftimit të institucionit, procesi i hartimit dhe administrimit të testit është realizuar duke zbatuar parimet e transparencës, integritetit dhe trajtimit të barabartë, ku pyetjet janë hartuar në ditën e testimit në prani të vëzhguesve. Mbarëvajtja e këtij procesi është përcjellë nga përfaqësues të partnerëve vendorë dhe ndërkombëtarë, përfshirë Misionin e Bashkimit Europian për Sundimin e Ligjit, OSBE-në dhe AVONET-in. Procedura e rekrutimit do të vijojë me fazat e tjera, që përfshijnë testin me shkrim dhe intervistimin e kandidatëve, ndërsa Këshilli Prokurorial i Kosovës theksoi se procesi po zhvillohet mbi bazën e meritës dhe profesionalizmit.