Kozo Tashima kandidon për president të FIFA-s kundër Gianni Infantinos

Ish-futbollisti japonez 68-vjeçar Kozo Tashima ka njoftuar zyrtarisht kandidaturën e tij për president të FIFA-s pas një mbledhjeje të bordit të Federatës Japoneze të Futbollit, duke u bërë kandidati i parë japonez që synon drejtimin e shtëpisë botërore të futbollit në zgjedhjet që do të mbahen në marsin e ardhshëm.

Tashima ka qenë pjesë e Këshillit të FIFA-s që nga viti 2015 dhe ka punuar me presidentin aktual Gianni Infantino për gati 11 vjet. Ai ka drejtuar Federatën Japoneze të Futbollit nga viti 2016 deri në vitin 2024, kur u pasua nga Tsuneyasu Miyamoto. Shtëpia botërore e futbollit po kalon një moment të vështirë pas dështimit të planit të Infantinos për shitjen e aksioneve tek investitorët privatë. Ndërkaq, ish-mbrojtësi i Tottenham Hotspur, Ramon Vega, ishte i pari që në muajin tetor njoftoi publikisht synimin për të garuar kundër Infantinos.

Për të konfirmuar pjesëmarrjen zyrtare në garë, Tashima duhet të sigurojë nominimet nga së paku pesë federata kombëtare prej 211 federatave anëtare me të drejtë vote që numëron FIFA. Federata Japoneze e Futbollit i ka ofruar përkrahje maksimale Tashimas. Presidenti aktual 56-vjeçar, Gianni Infantino, ka hasur në kundërshtime pas përpjekjes për krijimin e një entiteti të ri komercial, megjithëse në muajin e kaluar mori mbështetjen e presidentit të futbollit aziatik.

Afati i fundit për dorëzimin e kandidaturave zyrtare për drejtimin e FIFA-s përfundon më 18 nëntor.

«Jam mirënjohës që mund ta bëj këtë njoftim me mbështetjen e plotë të JFA-së», deklaroi Tashima para gazetarëve në Tokio. Ai shtoi: «Çështja nuk është fitorja apo humbja, por përcjellja te bota e qëndrimit të ndershëm, të shëndoshë dhe të drejtë që futbolli japonez ka ndërtuar. FIFA ka nevojë për këto vlera që ne i kemi mbrojtur. Kam vendosur të kandidoj për ta përcjellë këtë mesazh në botë». Tashima gjithashtu tha se «Gjëja më e keqe që mund të ndodhë është që Infantino të rizgjedhet në post pa zgjedhje fare».