Kovaçi: Pedagogët do të jenë çdo ditë në krah të studentëve

Protestat e studentëve kanë hyrë në ditën e katërmbëdhjetë radhazi, ndërsa kreu i Sindikatës së Universiteteve, Aleksandër Kovaçi, ka konfirmuar mbështetjen e pedagogëve për të rinjtë. Gjatë një prononcimi nga tubimi i zhvilluar para Ministrisë së Arsimit, ai theksoi se bojkoti i mësimit është vullnetar dhe se numri i studentëve në salla nuk mjafton për vijimin normal të procesit.

Kovaçi u shpreh se studentët kanë kaluar në një fazë të re organizimi përmes ngritjes së forumeve për të koordinuar lëvizjen e tyre. Sipas tij, pedagogët kanë anuluar një takim të planifikuar për në orën 10:00 me qëllim që të mos shpërqendronin vëmendjen nga protesta, ndërsa konfirmoi se ata do të jenë të pranishëm çdo ditë në orën 14:00 për të mbështetur thirrjet e studentëve.