Si merr kontrata milionëshe kompania e akuzuarit për Banjskën?
Steviq, i akuzuar për Banjskën, mori mbi 1 milion euro kontrata nga institucionet serbe, ndërsa selia e firmës në Zveçan është e zbrazët.
ZVEÇAN — Institucionet serbe vazhdojnë t'i ndajnë kompanisë "Rad 028" kontrata milionëshe për punë ndërtimore në Kosovë, përmes organeve të përkohshme komunale të themeluara sipas ligjeve serbe.
Pronari i kompanisë, Radulle Steviq, është nën akuzë në Kosovë për sulmin e armatosur në Banjskë dhe nën sanksionet e Shteteve të Bashkuara prej pesë vjetësh, për lidhjet e tij me Millan Radoiçiqin dhe akuza për krim të organizuar e korrupsion.
Sipas regjistrit të bizneseve në Serbi, selia e kompanisë "Rad 028" është e regjistruar në qendër të Zveçanit. Radio Evropa e Lirë vizitoi këtë adresë dhe gjeti një ndërtesë shumëkatëshe të zbrazët, me dyer të mbyllura dhe asnjë shenjë të veprimtarisë. "Prej kohësh nuk është askush aty. Është bosh," tha për REL-in një banore e Zveçanit.
Vetëm që nga fillimi i këtij viti, institucionet serbe i kanë lidhur me kompaninë e Steviqit dhjetë kontrata me vlerë mbi një milion euro, edhe pse ajo nuk i ka përfunduar më shumë se njëzet punë të mëparshme, të cilat i ishin besuar në mjediset me shumicë serbe në Kosovë.
Radio Evropa e Lirë vizitoi gjashtë lokacione në Kosovë ku kompania "Rad 028" duhej të kryente punime ndërtimore. Në asnjërin nuk u panë punime në zhvillim dhe mungonin tabelat informuese të zakonshme për investitorin. Punimet që figurojnë zyrtarisht si të përfunduara nuk u konfirmuan në terren.
Sipas aktakuzës së Kosovës, Steviq, përmes kompanive të tij, e ka ndihmuar udhëheqësin e grupit të armatosur Millan Radoiçiq në pastrimin e parave. Beogradi zyrtar, i cili nuk e njeh Kosovën si shtet, e hedh poshtë këtë akuzë.
Shumica e kontratave u lidhën me organet e përkohshme komunale të themeluara sipas ligjeve serbe në komunat me shumicë serbe në Kosovë. Kosova i mbylloi këto institucione në vitin 2024, duke i cilësuar si të paligjshme, por ato vazhdojnë punën nga lokacione alternative në qytete serbe pranë kufirit.
Se ku ndodhet aktualisht Radulle Steviq nuk dihet. Policia dhe Prokuroria në Beograd nuk u përgjigjën Radios Evropa e Lirë nëse ai ndodhet në Serbi ose nëse është nën hetime. As kompania "Rad 028" nuk u përgjigj në pyetjet e REL-it për kriteret e kontraktimit ose mbikëqyrjen e projekteve.
Burim: Almakos
— Redaksia ZHURMA
Bisedoni
Komentet janë të hapura për anëtarët e Zhurma. Llogaria është falas — krijo një ose hyr në llogarinë tënde për me e thanë mendimin.