Kongresmenë amerikanë kërkojnë zhvendosjen e OSBE-së nga Beogradi në Charleston
Rezoluta 1451, e nisur nga kongresmeni Joe Wilson dhe bashkënënshkruar nga rreth 40 ligjvënës, kërkon zhvillimin e sesionit 2027 në Charleston.
Redaksia ZHURMA · · 1 min lexim
UASHINGTON — Në Kongresin Amerikan është paraqitur Rezoluta Kongresionale 1451, e cila kërkon që sesioni vjetor i Asamblesë Parlamentare të OSBE-së për vitin 2027 të mbahet në Charleston të Karolinës së Jugut e jo në Beograd, ka bërë të ditur avokuesi i çështjes së Kosovës në SHBA, Faton Bislimi.
Sipas Bislimit, rezoluta është iniciuar nga kongresmeni Joe Wilson, i njohur si mbështetës i vjetër i Kosovës, dhe është bashkënënshkruar nga rreth 40 ligjvënës republikanë e demokratë. Bislimi e ka cilësuar zhvillimin si të rëndësishëm, duke thënë se puna e vazhdueshme në Uashington po jep rezultate.
Bislimi ka theksuar se prej mbi dy dekadash argumentohet në Uashington se stabiliteti në Ballkan nuk ndërtohet duke shpërblyer politika që bien ndesh me interesat e Perëndimit. Ai ka përsëritur se Serbia mbetet instrument i ndikimit rus në Evropë, ndërsa ka thelluar lidhjet me Kinën dhe Iranin.
Për këtë arsye, sipas tij, institucionet euroatlantike duhet të dërgojnë mesazhe të qarta në mbrojtje të demokracisë dhe sigurisë kolektive — argumente të përfshira edhe në Rezolutën 1451. Bislimi falënderoi Wilson-in dhe bashkënënshkruesit e tjerë për mbështetjen ndaj Kosovës.
Burim: Telegrafi
— Redaksia ZHURMA
