Koncesionarët në Ohër ndërtojnë mure betoni — shkelin rregullat e UNESCO-s

OHËR — Organizata ekologjike "O2 Iniciativa" ka denoncuar publikisht koncesionarët e plazheve në Liqenin e Ohrit për shkelje të vazhdueshme të rekomandimeve të UNESCO-s dhe të kontratave të koncesionit, duke vendosur shezllone jashtë normave të lejuara dhe duke ndërhyrë me mure betoni në zonat bregdetare.

Aktivistët sqaruan se, sipas rregullave në fuqi, të paktën 50 përqind e hapësirës së plazhit duhet të mbetet e lirë nga shezllonet dhe pajisjet e tjera komerciale. Megjithatë, në zona të njohura si Kaneo dhe Potpesh, pajisjet janë vendosur ngjitur me njëra-tjetrën dhe janë ndërtuar mure betoni, duke shkaktuar dëme mjedisore.

Në reagimin e saj, organizata kritikoi ashpër neglizhencën e institucioneve dhe të inspektoratit lokal, duke theksuar se asnjë zyrtar nuk po ndërmerr masa ndaj këtij "ligji të xhunglës". Ata i bënë thirrje të drejtpërdrejtë kryetarit të Komunës së Ohrit, Kiril Pecakov, që të ndërhyjë urgjentisht për të zbatuar rregulloret ligjore bregdetare.

Për të ilustruar zbatimin e ligjit, organizata krahasoi situatën me vende si Portugalia, ku 70 përqind e plazhit duhet të jetë e lirë, ose Greqia, e cila ndalon marrjen me qira të plazheve më të ngushta se katër metra. Ndërkohë, në Ohër, i cili është ndër të paktat vende në botë nën mbrojtjen e UNESCO-s, rregullat nuk respektohen.

Ky denoncim vjen në një kohë kur Komiteti i Trashëgimisë Botërore të UNESCO-s ka propozuar sërish që rajoni i Ohrit, i ndarë mes Shqipërisë dhe Maqedonisë së Veriut, të vendoset në listën e trashëgimisë në rrezik për shkak të dështimit për të ndërmarrë masa mbrojtëse.

Burim: Portalb
— Redaksia ZHURMA