Pse postimet në rrjete sociale mund të krijojnë probleme ligjore në Serbi?

PRISHTINË — Qytetarët që planifikojnë të udhëtojnë ose të kalojnë transit nëpër Serbi duhet të tregojnë kujdes të shtuar me përmbajtjet që kanë publikuar në rrjetet sociale dhe platformat publike në internet. Paralajmërimi vjen nga avokati Arianit Koci, i cili thekson se aktivitetit online mund t'i shoqërojnë pasoja ligjore në territorin e atij shteti.

Koci, përmes një reagimi në Facebook, shpjegon se postimet, komentet apo përmbajtjet që interpretohen si fyese, kërcënuese ose si nxitje e urrejtjes, mund të tërheqin vëmendjen e autoriteteve serbe. Sipas tij, këto trajtohen sipas legjislacionit në fuqi, gjë që mund të sjellë pasoja serioze për udhëtarët, varësisht nga interpretimi ligjor i autoriteteve.

Avokati thekson se përmbajtjet digjitale, përfshirë edhe postimet e vjetra, mund të shqyrtohen gjatë hyrjes apo qëndrimit në Serbi. Nëse vlerësohen si të papërshtatshme, ekziston mundësia që personat të ndalohen, të intervistohen dhe madje të procedohen penalisht ose për kundërvajtje, sipas deklaratës së tij të transmetuar nga Klankosova.tv.

Koci u bë thirrje qytetarëve që para udhëtimit të rishikojnë aktivitetin e tyre publik në internet. Ai thekson se gjurmët digjitale mund të kenë një ndikim real në kufi dhe gjatë qëndrimit në një shtet tjetër, duke i bërë udhëtarët të ekspozohen ndaj procedurave ligjore në Serbi.

Burim: Klan Kosova
— Redaksia ZHURMA