Fehim Zavalani e Gjergj Qiriazi themelojnë klubin "Bashkimi" në Manastir
Fehim Zavalani dhe Gjergj Qiriazi e themeluan për të përhapur shkollat dhe gjuhën shqipe, me një krah të fshehtë që punonte për autonominë e vendit.
MANASTIR — Më 31 korrik 1908, patriotët Fehim Zavalani dhe Gjergj Qiriazi themeluan klubin “Bashkimi”, një organizatë politiko-kulturore që luajti rol të rëndësishëm në lëvizjen kombëtare shqiptare. Sipas Muzeut Historik Kombëtar, synimi ishte përparimi kombëtar përmes përhapjes së shkollave shqipe dhe zhvillimit të gjuhës shqipe.
Brenda klubit vepronte edhe një strukturë e fshehtë, e angazhuar politikisht për realizimin e autonomisë së vendit. Veprimtarinë e mbështeti shtypi patriotik i kohës, veçanërisht gazetat “Bashkimi i Kombit” dhe “Drita”, që ndihmuan në ndërgjegjësimin e opinionit publik për çështjen kombëtare.
Klubi “Bashkimi” pati rol të rëndësishëm në Kongresin e Manastirit të vitit 1908, në përpjekjet për njësimin e alfabetit shqip, dhe një vit më vonë koordinoi veprimtarinë kulturore e arsimore të klubeve shqiptare në Kongresin e Elbasanit. Më 1910, përndjekjet e autoriteteve xhonturke e detyruan të ndërpriste përkohësisht aktivitetin, por ai e rifilloi punën deri në shpalljen e Pavarësisë.
Burim: KultPlus
— Redaksia ZHURMA
