Projekti "KINGCOAST ALBANIA" kërcënon Divjakë-Karavastën?

DIVJAKË — Ekonomisti Enea Janko, me banim në Shtetet e Bashkuara, ka denoncuar publikisht një projekt gjigant që pretendohet të zhvillohet brenda dhe në afërsi të Parkut Kombëtar Divjakë-Karavasta. Sipas dokumenteve të publikuara në librin "Albanian Files", projekti "KINGCOAST ALBANIA" parashikon një qytet të ri me rreth 50 mijë banorë, një resort turistik të madh dhe infrastrukturë shoqëruese.

Janko ngre shqetësimin se mungon transparenca publike mbi procedurat, statusin ligjor dhe procesin e vendimmarrjes — një model i ngjashëm me atë të projekteve të debatuara në Zvërnec dhe Sazan.

Sipas postimit të Jankos, projekti i ri vjen pas dështimit të megaprojektit të propozuar nga kompania e Behgjet Pacollit. "KINGCOAST ALBANIA" i përket një investitori të huaj dhe, sipas raportimeve mediatike, ka marrë miratimin e kryeministrit të Shqipërisë.

Në terren, pavarësisht mungesës së njoftimeve zyrtare për miratimin ligjor, duket se ka filluar puna. Një shëtitore e re prej 20 km rreth Lagunës së Karavastasë pothuajse ka përfunduar — element që përkon me masterplanin e projektit.

Investimi prej më shumë se 4 milionë euro është financuar tërësisht nga buxheti i shtetit shqiptar nëpërmjet Fondit Shqiptar të Zhvillimit, me mbështetje nga Bashkia Divjakë. Kompania pretendon se do të ndërtojë një "eco city" dhe resort në harmoni me natyrën.

Janko kërkon debat të hapur publik dhe sqarime institucionale. Ai thekson se Divjakë-Karavasta është ekosistemi më i rëndësishëm natyror në Shqipëri dhe një nga më të rëndësishmit në Europë, i mbrojtur nga legjislacioni shqiptar, europian dhe konventat ndërkombëtare.

Ndërkohë, Bashkia Divjakë ka humbur rreth 60% të popullsisë së saj — mbi 30 mijë qytetarë të larguar jashtë vendit — ndërsa mijëra shtëpi dhe vila të kushtuara me miliarda euro vazhdojnë të amortizohen nga mungesa e përdorimit.

Burim: Të Sheshi, https://tesheshi.com/pas-zvernecit-alarm-edhe-per-parkun-natyror-divjake-karavasta/
— Redaksia ZHURMA