Burrë hap zjarr ndaj veturës me tre punëtorë të KRU-së në Vushtrri
Incidenti ndodhi më 29 korrik në fshatin Pantinë, teksa tre punëtorë po shkyçnin një konsumator nga rrjeti i ujësjellësit.
VUSHTRRI — Tre punëtorë të KRU "Mitrovica" u kërcënuan me armë zjarri më 29 korrik, rreth orës 11:55, në fshatin Pantinë, ndërsa po shkyçnin një konsumator nga rrjeti i ujësjellësit, njoftoi Policia e Kosovës.
Sipas raportit policor, i dyshuari, një mashkull kosovar, dyshohet se ka shtënë me armë zjarri në drejtim të veturës ku ndodheshin punëtorët, i ka fyer dhe kanosur, pastaj është larguar në drejtim të panjohur. Rasti është hapur në koordinim me prokurorin dhe hetohet për "kanosje", "përdorim të armës" dhe mbajtje të paautorizuar të armës.
KRU "Mitrovica" konfirmoi se punëtorët e saj janë kërcënuar me armë gjatë një ndërhyrjeje për shkyçje konsumatori dhe kërkoi trajtim serioz nga institucionet e sigurisë. Rasti vjen pas një incidenti të ngjashëm kohët e fundit, kur një person hapi zjarr ndaj punëtorëve të ujësjellësit pasi ata i ndërprenë ujin.
Burim: Gazeta Express
— Redaksia ZHURMA