Çfarë kërcënime kibernetike dhe hibride përballet Shqipëria sipas Ismailit?

TIRANË — Ministrja e Shtetit për Marrëdhëniet me Parlamentin, Erjona Ismaili, paraqiti sot në Kuvend projektligjin e ndryshuar “Për Shërbimin Informativ Kombëtar” (SHISH), duke theksuar se ky ligj synon forcimin e kapaciteteve të shtetit për mbrojtjen e sigurisë kombëtare dhe interesave strategjike. “Në një kohë kur mjedisi i sigurisë është bërë më kompleks, institucionet duhet të mbështeten në një kuadër ligjor të qartë dhe bashkëkohor,” deklaroi ajo.

Ismaili vuri në dukje se ligji aktual, i miratuar në vitin 1998, nuk pasqyron më realitetin e sotëm. Krahas kërcënimeve tradicionale, Shqipëria përballet me sulme kibernetike, kërcënime hibride, veprimtarinë e shërbimeve të huaja të inteligjencës, si dhe rreziqe ndaj infrastrukturës kritike. “Shteti duhet të ketë mekanizma më të mirë për parandalimin dhe reagimin ndaj këtyre kërcënimeve,” shtoi ajo.

Ndryshimet e propozuara synojnë përditësimin e kuadrit ligjor dhe përshtatjen me përgjegjësitë e Shqipërisë si anëtare e NATO-s dhe në procesin e integrimit në BE. “Projektligji përmban tetë nene dhe përmirëson dispozitat ekzistuese, duke reflektuar zhvillimet e fundit në fushën e sigurisë,” shpjegoi Ismaili. Një nga ndërhyrjet kryesore është qartësimi i objektit të veprimtarisë së SHISH-it, duke përfshirë kërcënimet nga shërbimet e huaja, terrorizmi, ekstremizmi, armët e dëmtimit në masë, si dhe kërcënimet kibernetike dhe hibride.

Ministrja theksoi gjithashtu rëndësinë e sigurisë kolektive, duke nënvizuar se Shqipëria, si vend anëtar i NATO-s, ka përgjegjësi jo vetëm për mbrojtjen e sigurisë së saj, por edhe për kontributin në sigurinë e përbashkët. “Ky është një hap i nevojshëm për të garantuar institucione më të koordinuara dhe efektive,” tha ajo.

Burim: ATSH
— Redaksia ZHURMA