Kennet Eichhorn pezullon futbollin për shkak të çrregullimit metabolik
Mesfushori 17-vjeçar, i cili iu bashkua Bayer Leverkusenit këtë verë për 9 milionë euro, pritet të humbasë të paktën pjesën e parë të sezonit të ri.
LEVERKUSEN — Supertalenti i futbollit gjerman, Kennet Eichhorn, ka vendosur të pezullojë përkohësisht karrierën e tij pas diagnostikimit me një çrregullim të rëndë metabolik. Mesfushori 17-vjeçar, i konsideruar si ndër më premtuesit në Evropë, sapo ishte transferuar te Bayer Leverkusen për një shumë prej nëntë milionë eurosh.
Sipas raportimeve të gazetës gjermane Bild, Eichhorn pritet të humbasë të paktën pjesën e parë të sezonit të ri, ndërsa ende nuk ka një datë të caktuar për rikthimin e tij në fushë. Klubi ka bërë të ditur se do t'i japë kohën e nevojshme pa ushtruar presion.
Problemet shëndetësore për lojtarin filluan muajin e kaluar pas një infeksioni gastrointestinal, gjatë të cilit ai humbi rreth pesë kilogramë në vetëm pesë ditë. Pas ekzaminimeve në një klinikë të specializuar, u zbulua çrregullimi metabolik që e detyroi atë të ndërpresë çdo aktivitet fizik.
Përpara këtij transferimi te Leverkuseni, Eichhorn shkëlqeu me skuadrën e Hertha Berlin, duke tërhequr vëmendjen e klubeve si Real Madrid, Barcelona e Bayern Munich. Ndonëse klauzola e tij shkonte deri në 12 milionë euro, Leverkuseni veproi shpejt duke e blerë për nëntë milionë euro.
Klubi gjerman ka konfirmuar se do t'i ofrojë mbështetje maksimale familjes së tij gjatë këtij procesi të gjatë të rehabilitimit. Drejtuesit mbeten optimistë se pas stabilizimit të gjendjes, mesfushori do të rikthehet në fushë për të vazhduar zhvillimin e tij si një nga talentet më të mëdhenj gjermanë.
Burim: Telegrafi
— Redaksia ZHURMA
