Këlliçi: Mazhoranca po mban peng katër nismat e opozitës

Nënkryetari i Grupit Parlamentar të Partisë Demokratike, Belind Këlliçi, akuzoi mazhorancën në mbledhjen e Konferencës së Kryetarëve se po mban peng katër nisma ligjore të opozitës duke mos u caktuar datë shqyrtimi. Ai kërkoi përfshirjen e menjëhershme në rendin e ditës dhe votimin e paketës që synon shfuqizimin e ligjeve për investimet strategjike, zonat e mbrojtura, paketën e maleve dhe trashëgiminë kulturore.

Kjo kërkesë vjen pas publikimit të Raportit të Komisionit Evropian për Shqipërinë. Sipas deklaratave të opozitës në mbledhje, raporti i BE-së evidenton dobësimin e kontrollit parlamentar, mosfunksionimin demokratik të Kuvendit, cenimin e të drejtave kushtetuese të opozitës, shkeljen e parimit të barazisë përpara ligjit në çështjen e imunitetit të Belinda Ballukut si dhe moszbatimin e disa vendimeve të Gjykatës Kushtetuese nga shumica parlamentare.

Sipas Këlliçit, pas 11 vitesh zbatim të ligjit për Investimet Strategjike, 98% e kontratave të përfituara u përkasin pesë oligarkëve dhe përfaqësuesve të krimit të organizuar. AI shtoi se vetëm 2% e vendimeve janë për investitorë të huaj, ku hyjnë edhe dy njerëz të afërt të kryeministrit Edi Rama. Deputeti demokrat theksoi gjithashtu se ky kuadër ligjor është përdorur si instrument për pastrimin e parave të pista, veçanërisht në sektorin e ndërtimit në bregdet, duke vënë pronën dhe pasuritë publike në shërbim të interesave private.

Përfaqësuesi i opozitës i bëri thirrje kryetarit të Kuvendit që të dalë garant për futjen e këtyre katër nismave në rendin e ditës, në mënyrë që ato të shqyrtohen dhe të votohen në seancën e parë parlamentare. Këlliçi pretendoi se këto propozime nuk janë vetëm kërkesa të Partisë Demokratike, por pasqyrojnë kushte të drejtpërdrejta të institucioneve të Bashkimit Evropian për procesin e integrimit të vendit.

Këlliçi u shpreh gjatë fjalës së tij në mbledhje: «Kthejeni këtë institucion në shinat e kushtetutshmërisë! Mos e përdorni Kuvendin si paradhomë të Partisë Socialiste. Ju nuk mund t'i trajtoni institucionet e këtij vendi si pronë private. Nuk mund t'i përdorni ato sipas interesave tuaja politike dhe as të përjashtoni opozitën nga funksionimi normal i institucioneve kushtetuese. E keni bërë këtë dhe për këtë arsye keni humbur besimin e qytetarëve. E keni bërë këtë dhe për këtë arsye keni marrë urrejtjen e studentëve. E keni bërë këtë duke menduar se pushteti dhe institucionet janë pronë e juaja. Por institucionet nuk janë pronë e askujt. Dhe fundi politik i kësaj mënyre qeverisjeje tashmë dihet».