KDI: Reforma në drejtësi ka avancuar në procedura, por pa rezultate

Instituti Demokratik i Kosovës ka publikuar raportin me titull „Reforma në Drejtësi: Ligje në Proces, Rezultate në Pritje”, i cili analizon zhvillimet institucionale gjatë periudhës janar–qershor 2026. Vullnet Bugaqku nga KDI u shpreh se reforma në drejtësi ka shënuar progres kryesisht në aspektin procedural, ndërsa pakoja e pesë projektligjeve ka kaluar nëpër faza të harmonizimit dhe konsultimit publik por ende nuk është miratuar. Sipas raportit, deri më 30 qershor 2026 asnjëri prej pesë projektligjeve nuk ishte miratuar.

Bugaqku bëri të ditur se te Projektligji për Byronë Shtetërore për Verifikimin dhe Konfiskimin e Pasurisë së Pajustifikueshme janë evidentuar mangësi në procesin parlamentar, përfshirë tentativën për organizimin e një dëgjimi publik me më pak se 24 orë njoftim. Po ashtu, KDI gjeti se vetëm funksionimi i plotë i Byrosë do të kërkonte rreth 1.2 milion euro në vit për shpenzime për funksionalizimin e saj. Raporti thekson se projektligjet kishin kaluar më herët nëpër vlerësimin e Komisionit të Venecias, ndërsa problemi qëndron te pamundësia për të verifikuar në çfarë mase janë reflektuar rekomandimet në versionet pasuese.

Florent Spahija nga KDI tha se përvoja e Këshillit Prokurorial të Kosovës tregon sfidat gjatë zbatimit të ndryshimeve të mëdha institucionale. Zbatimi i ligjit që ndryshoi përbërjen dhe organizimin e KPK-së u shoqërua me përbërje të paplotë, mungesë kuorumi dhe konteste zgjedhore, kurse probleme me kuorumin dhe proceset e përzgjedhjes u vërejtën edhe në Këshillin Gjyqësor të Kosovës. KDI vlerëson se miratimi i ligjeve duhet të jetë vetëm hapi i parë dhe se suksesi i reformës do të matet me zbatimin në praktikë.