KASH: Uji i lumit Ibër nuk duhet përdorur si armë presioni ndaj Kosovës
Këshilli i Ambasadorëve Shqiptarë ka reaguar ndaj deklaratave të presidentit serb Aleksandar Vuçiç për mundësinë e ndryshimit të rrjedhës së lumit Ibër.
PRESHEVË — Këshilli i Ambasadorëve Shqiptarë (KASH) ka ngritur alarmin pas deklaratave të Presidentit të Serbisë, Aleksandar Vuçiç, lidhur me mundësinë e ndryshimit të rrjedhës së lumit Ibër dhe angazhimin e ekspertëve për këtë çështje.
Në një deklaratë publike, KASH thekson se uji si një burim jetik nuk mund të përdoret si instrument presioni politik ndaj Republikës së Kosovës. Këshilli paralajmëron se çdo ndërhyrje e njëanshme në rrjedhën e Ibrit mund të ketë pasoja të drejtpërdrejta dhe të rënda për furnizimin me ujë, energjinë, ekonominë dhe mjedisin në Kosovë, duke dëmtuar qytetarët pa dallim etnie.
KASH kërkon nga Beogradi transparencë dhe sqarime zyrtare, ndërkohë që u bën thirrje Shteteve të Bashkuara, Bashkimit Evropian, OSBE-së dhe partnerëve të tjerë ndërkombëtarë që të reagojnë me seriozitet ndaj këtyre zhvillimeve, duke kujtuar se e drejta ndërkombëtare e ujërave ndërkufitare kërkon bashkëpunim, përdorim të drejtë dhe parandalim të dëmeve të konsiderueshme.