Karoglan largohet nga Ballkani për arsye personale

Mislav Karoglan nuk do të jetë më trajner i Ballkanit. Klubi nga Suhareka ka bërë të ditur se tekniku kroat po largohet për motive personale, duke i dhënë fund bashkëpunimit që nisi në nëntor të vitit 2025, kur ai u bë trajneri i parë i huaj në historinë e klubit.

Në njoftimin zyrtar, Ballkani e falënderon Karoglanin për punën dhe kontributin, duke i uruar suksese në karrierën e tij të mëtejshme. “Mislav, faleminderit për gjithçka dhe suksese në rrugëtimin tënd të ardhshëm”, thuhet në komunikatën e klubit. Gjithashtu, klubi shpreh mirënjohje për periudhën e kaluar së bashku, duke e cilësuar atë pjesë të familjes së Ballkanit.

Ende nuk është bërë e ditur se kush do të marrë drejtimin e skuadrës pas largimit të Karoglanit.