Bllokohen 45 linqe në TikTok pas ankesave për videot intime

Autoriteti i Mediave Audiovizive ka ndërmarrë një nismë vullnetare në bashkëpunim me platformën TikTok për fshirjen e materialeve të papërshtatshme që cenojnë privatësinë, shkaktojnë bullizëm apo fenomene të rënda sociale. Zhvillimi i fundit vjen pas një fluksi ankesash të drejtuara në institucion, të cilat u nxitën pas një apeli publik të bërë nga emisioni Tech Talk. Kryetarja e AMA-s, Armela Krasniqi, deklaroi se reagimi ka qenë i menjëhershëm pas këtij apeli në televizion. «Pas apelit publik që u bë nga emisioni Tech Talk, ne në fakt patëm fluks ankesash, të cilat vinin nga qytetarë, nga artistë të prekur, edhe nga shoqëri civile, nga disa organizata», u shpreh kryetarja e AMA-s, Armela Krasniqi.

Statistikat zyrtare tregojnë se numri i ankesave për këtë rast përbën afërsisht sa gjysma e totalit të raportimeve që janë ndërmarrë gjatë vitit 2026. Mes dhjetëra ankesave të adresuara pranë institucionit, përmes bashkëpunimit me platformën TikTok është bërë i mundur bllokimi i 45 linqeve. Kryetarja e AMA-s ka dhënë detaje shtesë mbi shifrat e trajtuara nga institucioni. «Nëse nga shkurti deri në fillim të tetorit kemi administruar në institucion 326 ankesa, nga të cilat 140 janë gjetur në shkelje dhe platforma ka hequr 112, për rastin në fjalë vetëm gjatë kësaj jave janë përpunuar 54 ankesa, të gjitha në shkelje të legjislacionit dhe kodit të transmetimit, edhe për këtë arsye i jemi drejtuar TikTok-ut, që ka hequr deri në momentin që flasim 45 të tilla dhe 9 të tjera janë ende në shqyrtim», tha Krasniqi.

Ndonëse në këtë fushë ekziston një boshllëk ligjor për monitorimin e platformave digjitale, Autoriteti i Mediave Audiovizive ka vazhduar angazhimin përmes bashkëpunimit vullnetar. Artistët e prekur, të cilët shfaqen në video intime në internet, kanë nisur ankesat pranë këtij autoriteti për fshirjen e materialeve nga platformat digjitale. Për shkak të kësaj situate, institucioni fton qytetarët dhe të gjithë të prekurit e tjerë që të dërgojnë ankesat e tyre përmes faqes zyrtare të internetit ama.gov.al, për të shqyrtuar çdo rast tjetër që paraqet shkelje të kodit të transmetimit dhe legjislacionit në fuqi.