Kandiq i kërkon BE-së reagim ndaj shtrembërimit të fakteve

Themeluesja e Fondit për të Drejtën Humanitare, Natasha Kandiq, i ka kërkuar ambasadorit të Bashkimit Evropian në Serbi, Andreas von Beckerath, që të reagojë ndaj mohimit dhe shtrembërimit të fakteve të vërtetuara gjyqësorisht lidhur me krimet e luftës. Në reagimin e saj të bërë publik, ajo thekson se vendimet e gjykatave po zëvendësohen me një të ashtuquajtur të vërtetë të popullit.

Sipas Kandiqit, krahas paralajmërimit se glorifikimi i kriminelëve të dënuar të luftës është në kundërshtim me vlerat evropiane, diplomati i BE-së duhej të kishte adresuar gjithashtu praktikën e mohimit të krimeve. Ajo ka vënë në pah se shtrembërimet më të mëdha kanë të bëjnë me gjenocidin në Srebrenicë dhe viktimat e luftës në Kosovë, duke shtuar se përballja e përgjegjshme me të kaluarën kërkon ndërprerjen e këtyre praktikave.

Organizata e drejtuar prej saj poseduje dokumentacionin që përmban bazën më gjithëpërfshirëse të të dhënave për humbjet njerëzore në Kosovë. Sipas deklarimeve të saj, Fondi për të Drejtën Humanitare dokumenton fatin individual të viktimave të të gjitha përkatësive etnike, duke disponuar dokumente të shumta gjyqësore, dëshmi të familjarëve dhe dëshmitarëve.

Kandiq ka bërë të ditur gjithashtu se institucioni i saj zotëron një koleksion të veçantë të incizimeve video të dëshmive të dhëna para Tribunalit Penal Ndërkombëtar për ish-Jugosllavinë lidhur me luftërat e zhvilluara që nga viti 1991. Sipas saj, ky dokumentacion mund të ndihmojë Prokurorinë për Krime Lufte të Serbisë, por vetëm nëse ajo vepron në mënyrë të pavarur nga udhëzimet politike.

Në thirrjen e saj drejtuar Bashkimit Evropian, ajo ka kërkuar mbështetje politike dhe financiare për përfshirjen e brezave të rinj dhe studentëve në hulumtimin e luftërave të viteve 1990. Ajo vlerëson se të rinjtë duhet të kenë mundësinë të shqyrtojnë provat dhe të rivlerësojnë në mënyrë kritike narrativat mbizotëruese për të kaluarën.

«Pavarësia e gjyqësorit, për të cilën insiston BE-ja, duhet të shtrihet edhe në ndjekjen penale të krimeve të luftës», ka deklaruar Kandiq. Në përfundim, ajo ka paralajmëruar se politika e kujtesës është shndërruar në një armë të re lufte që thellon ndarjet kombëtare, ndërsa faktet e dokumentuara mund të ndihmojnë në forcimin e bashkëpunimit rajonal.