Kampionati Kombëtar i Shpëtimit në Ujë 2026 vë në fokus sigurinë në plazhe

Federata Shqiptare “Vrojtuesit e Plazhit dhe Shpëtimit në Ujë” organizoi Kampionatin Kombëtar të Shpëtimit në Ujë 2026, me mbështetjen e Ministrisë së Turizmi, Kulturës dhe Sportit. Veprimtaria vuri në provë shpejtësinë, teknikën dhe qëndrueshmërinë e garuesve në disiplina që ndërthurin garën sportive me aftësitë për të shpëtuar jetë.

Në këtë aktivitet, që zhvillohet prej vitit 2019, morën pjesë 34 garues në kategori për meshkuj dhe femra, përmes garave të zhvilluara në pesë disiplina të ndryshme. Ministri Blendi Gonxhja theksoi në një postim në rrjetet sociale se përgatitja në këto fusha merr vlerë të veçantë gjatë sezonit veror, kur siguria e pushuesve kërkon vigjilencë dhe ndërhyrje të shpejtë nga postacionet e vrojtimit. «Zhvillimi i turizmit kërkon edhe më shumë siguri në bregdet, ndaj mbështesim nisma që forcojnë kulturën e parandalimit dhe shpëtimit në ujë», u shpreh kreu i MTKS-së.

Statistikat globale tregojnë se çdo vit mbi 300,000 njerëz humbin jetën nga mbytja në ujë, ndërsa shifra arrin në 30 persona çdo orë. Këto humbje mund të uleshin ndjeshëm përmes parandalimit, investimit në sigurinë e plazheve publike dhe garantimit të pranisë së vrojtuesve të trajnuar në çdo zonë ku lejohet notimi.