Bashkëpunim në fushën e arkivave mes Shqipërisë dhe Kosovës
Ambasadori Petrit Malaj takon Auron Rrokajn dhe Përparim Ramën për forcimin e lidhjeve ndërinstitucionale.
Redaksia ZHURMA · · 1 min lexim
Ambasadori i Shqipërisë në Kosovë, Petrit Malaj, mori pjesë në takimin ndërmjet Drejtorit të Përgjithshëm të Arkivave të Shqipërisë, Auron Rrokaj, dhe kryetarit të Komunës së Prishtinës, Përparim Rama. Takimi u zhvillua me fokus forcimin e bashkëpunimit ndërinstitucional mes Tiranës dhe Prishtinës në fushën e arkivave.
Sipas njoftimit të lëshuar në rrjetin social Facebook, Ambasada e Shqipërisë në Kosovë theksoi rëndësinë e ruajtjes së kujtesës kombëtare, dokumentimit të historisë dhe përcjelljes së trashëgimisë së përbashkët ndër breza. Në njoftim u theksua se «arkivat janë shumë më tepër se ruajtës të dokumenteve historike; ato përfaqësojnë kujtesën kombëtare, dëshmojnë rrugëtimin tonë historik dhe lidhin brezat me identitetin dhe trashëgiminë tonë të përbashkët».
Gjithashtu, u vlerësua se digjitalizimi, restaurimi, shkëmbimi i përvojave dhe organizimi i aktiviteteve të përbashkëta kulturore krijojnë mundësi të reja për promovimin e kësaj pasurie. «Afrimi i institucioneve shqiptare është një tjetër hap drejt forcimit të lidhjeve mes Shqipërisë dhe Kosovës, në shërbim të kujtesës historike, kulturës dhe identitetit tonë kombëtar», thuhet në njoftim.
