Kadri Xhemajli dënohet me gjashtë muaj burgim efektiv për kanosjen e Kurtit

Gjykata Themelore në Prishtinë, Departamenti Special, e ka dënuar me gjashtë muaj burgim efektiv Kadri Xhemajlin, i cili kishte pranuar fajësinë për kanosjen e kryeministrit të Kosovës, Albin Kurti.

Sipas aktakuzës së Prokurorisë Speciale, Xhemajli e kishte kërcënuar Kurtin me privim nga jeta përmes një komenti të publikuar në rrjetin social Facebook. Paraprakisht, gjykata kishte aprovuar marrëveshjen për pranimin e fajësisë të arritur ndërmjet palëve, ku ishte rekomanduar që Xhemajli të dënohej me një vit burgim me kusht dhe një periudhë verifikuese prej tre vjetësh.

Megjithatë, gjykata nuk e aprovoi rekomandimin lidhur me lartësinë e dënimit dhe vendosi t'i shqiptojë gjashtë muaj burgim efektiv, duke njoftuar se i akuzuari ka të drejtë ankese. Xhemajli ngarkohej me veprën penale “Kanosja”, nga neni 181, paragrafi 3, lidhur me paragrafin 1 të Kodit Penal të Republikës së Kosovës.