Jesús de Miguel Alameda ndërron jetë në Spanjë pas përplasjes

Sulmuesi i Tenerife-s, Jesús de Miguel Alameda, ka ndërruar jetë në spital pas një përplasjeje të fortë që pësoi gjatë ndeshjes kundër Andorra-s në Spanjë, siç njoftoi klubi spanjoll këtë të martë, më 3 nëntor 2026, në orën 08:00.

Futbolli spanjoll u përfshi nga tronditja pasi 30-vjeçari u dërgua me urgjencë drejt spitalit për ndihmë mjekësore. Sipas mediave në Spanjë, lojtari pësoi atak kardiak gjatë aksionit ku u përplas ashpër nga portieri kundërshtar, Jesus Owono.

Ndeshja u ndërpre përfundimisht në minutën e 108, ndërsa arbitri ndëshkoi me karton të kuq portierin e Andorra-s për të lejuar ndërhyrjen e shpejtë të ekipeve mjekësore, të cilat e transportuan lojtarin me ambulancë.

Megjithëse fillimisht gjendja e tij nuk dukej shumë e rëndë dhe u dërgua për vizita të detajuara, situata u përkeqësua gjatë natës, duke sjellë ndarjen tragjike nga jeta të sulmuesit spanjoll në mëngjesin e së martës.

Në njoftimin e tyre zyrtar, CD Tenerife theksoi: «Të shkatërruar nga dhimbja, me një nyje në fyt dhe ende në pamundësi për të besuar se kjo është e vërtetë, nga CD Tenerife njoftojmë ndarjen tragjike nga jeta të Jesús de Miguel Alameda, e ndodhur këtë të martë, më 3 nëntor 2026, në orën 08:00. Nuk ka fjalë ngushëllimi dhe asgjë që mund ta lehtësojë këtë dhimbje të mbushur me trishtim. Jemi pranë familjes së tij të pikëlluar, pranë njerëzve të tij të dashur dhe pranë gjithë tifozëve të Tenerifes, të cilët sot vajtojnë këtë fund mizor. Familja e Jesús de Miguel falënderon për çdo mesazh dhe shenjë mbështetjeje të marrë, ndërsa kërkon me gjithë zemër respekt maksimal për privatësinë e saj në këto momente të tmerrshme».