Inspektorati mbyll restorantin dhe hotelin "Liqeni i Dukagjinit" në Gjakovë

GJAKOVË — Inspektorati i Mjedisit ka vendosur shiritat e mbylljes në restorantin dhe hotelin "Liqeni i Dukagjinit" në Gjakovë. Lajmin e ka bërë të ditur ministrja në detyrë e Mjedisit dhe Planifikimit Hapësinor, Fitore Pacolli, duke shkruar në Facebook se me këtë veprim i është dhënë fund veprimtarisë që zhvillohej në mënyrë të kundërligjshme në zonën e mbrojtur të Liqenit të Radoniqit. Pacolli ka theksuar se mbyllja është bërë për shkak të rrezikut që objekti paraqet për ujin e pijshëm, duke përforcuar se uji i pijshëm është pasuri publike dhe mbrojtja e tij nuk ka kompromis. Ajo ka paralajmëruar se institucionet do të vazhdojnë të veprojnë me vendosmëri për mbrojtjen e ujërave dhe zonave të mbrojtura në Kosovë. Sipas Telegrafit, restoranti ka reaguar duke thënë se është i hapur dhe nuk ka pranuar vendimin për mbyllje.