Pse IFJ-ja i quajti gjobat e KPM-së "formë censure"?
Zuliana Lainez dërgon mesazh solidariteti me mediat e gjobitura, ndërsa kryetari i AGK-së akuzon KPM-në se është kapur nga Vetëvendosja.
PRISHTINË — Presidenta e Federatës Ndërkombëtare të Gazetarëve (IFJ), Zuliana Lainez, i ka dërguar mesazh mbështetjeje gazetarëve dhe mediave kosovare të gjobitura nga Komisioni i Pavarur i Mediave. Në mesazhin e publikuar nga Asociacioni i Gazetarëve të Kosovës (AGK), Lainez i ka quajtur gjobat e KPM-së një "formë censure" ndaj mediave kritike.
"Asnjë lloj rregullimi nuk duhet të cenojë rendin juridik ndërkombëtar, respektimin e lirisë së shtypit dhe vendosjen e sanksioneve ekonomike ndaj mediave që janë kritike, sepse kjo është një formë censure. Demokracia ka nevojë për gazetari të lirë", tha Lainez.
IFJ përfaqëson rreth 600,000 profesionistë të medias nga 187 sindikata dhe shoqata në mbi 140 vende të botës. Gjatë një mbledhjeje të para disa ditëve, KPM-ja ka shqiptuar gjoba ndaj disa mediave lidhur me raportimin gjatë zgjedhjeve të shkurtit 2025.
Kryetari i AGK-së, Xhemajl Rexha, ka thënë se me këto gjoba KPM-ja "synon t'i disiplinojë mediat dhe ta dirigjojë politikat redaktoriale të tyre" — gjë që e cilëson "goditje e papranueshme për lirinë e medias dhe të shprehjes". Ai e ka quajtur këtë "vërtetim i kapjes së këtij institucioni nga Vetëvendosja".
Burim: Demokracia
— Redaksia ZHURMA