Hysen Dizdari boton monografinë e parë arkeologjike në filatelinë e Kosovës

PRISHTINË — Hysen S. Dizdari, studiuesi i filatelisë, botoi librin "Arkeologjia në pullat postare të Kosovës (2000–2025)", një monografi të plotë kushtuar 15 emisioneve të Postës së Kosovës, të emetuara gjatë një periudhe 25-vjeçare në nder të zbulimeve arkeologjike në territorin e Kosovës.

Libri fillon me emisionin e parë, kushtuar Mozaikut të Orfeut, dhe vijon me Hyjneshën Dardane e me artefakte arkeologjike të zbuluara në Dardani, te emisioni i dytë. Emisioni i katërt i kushtohet zbulimeve arkeologjike në qytetin antik të Ulpianës, ndërsa i tetë i kushtohet Kalasë së Prizrenit. Botimi mbyllet me emisionin e pesëmbëdhjetë, kushtuar mozaikut të dyshemesë së bazilikës episkopale të Justinianit II në Ulpianë, i datuar rreth viteve 535–545 e.s.

Vepra realizohet me standarde të larta tipografike dhe shtypje shumëngjyrëshe. Redaktimin gjuhësor e kryen Prof. Dr. Anton Nikë Berisha, njëri nga autoritetet më të njohura të gjuhës shqipe, ndërsa përkthimet në gjermanisht dhe frëngjisht u realizuan përkatësisht nga Albert Gjoka dhe Fatos Morina, duke i dhënë librit dimensionin e gjerë ndërkombëtar.

Shtëpia botuese "Emal", e njohur për cilësinë e botimeve, bashkëpunoi ngushtë me autorin në përgatitjen e veprës. Parathënia u shkrua nga akademiku Prof. Dr. Neritan Ceka, një autoritet i spikatur i arkeologjisë shqiptare, i cili shtron pyetjen themelore: "A mund të përcillet historia e një vendi përmes pullave postare?" — pyetje që përbën boshtin konceptual të gjithë veprës.

Ky libër përfaqëson studimin e parë monografik të këtij lloji në filatelinë e Kosovës. Deri më tani, filatelistët janë mbështetur në katalogët ndërkombëtarë si Michel, Scott, Yvert & Tellier dhe Stanley Gibbons, të domosdoshëm për identifikimin e emisioneve, por që nuk trajtojnë dimensionin historik, kulturor dhe interpretues të tyre. Botimi i Dizdarit hap një drejtim të ri studimi, ku pulla postare nuk shihet vetëm si objekt koleksionimi, por si dokument kulturor, historik dhe arkeologjik.

Libri përfshin edhe rubrika ndihmëse — fjalor filatelik, këshilla për filatelistët e rinj, pasthënie me karakter vlerësues, si dhe bibliografi të ndarë në literaturë arkeologjike-historike dhe filatelike, duke e bërë atë një mjet pune të dobishëm për shkencëtarë, studentë, koleksionistë dhe të gjithë lexuesit e interesuar për historinë dhe arkeologjinë e Kosovës.

Burim: Dielli
— Redaksia ZHURMA