Hoti: Projekti i gazit amerikan, kauzë për të dalë në protesta

PRISHTINË — Avdullah Hoti, anëtar i kryesisë së LDK-së dhe ish-kryeministër, ka kritikuar Qeverinë e Kosovës për refuzimin e projektit të gazit amerikan dhe politikat energjetike të vendit. Në një reagim publik, ai ngriti tri pyetje: pse kryeministri Albin Kurti e ka refuzuar projektin kur vendet e rajonit po përfshihen në të, pse nuk janë ndërtuar kapacitete të reja energjetike gjatë gjashtë viteve të qeverisjes, dhe kujt i shkon për shtati varësia e Kosovës nga importi i energjisë.

Hoti e cilësoi projektin e gazit jo vetëm çështje ekonomike, por lidhur drejtpërdrejt me orientimin gjeopolitik të Kosovës, sigurinë energjetike dhe marrëdhëniet me Shtetet e Bashkuara. Ai kritikoi edhe opozitën për trajtimin e kësaj teme vetëm gjatë fushatave zgjedhore.

Sipas tij, kauza të tilla duhet të jenë në qendër të angazhimit politik, duke përmendur si shembuj të tjerë suspendimin e Kosovës nga stërvitja ushtarake "Defender Europe 23" në vitin 2023 dhe pezullimin e dialogut strategjik Kosovë-SHBA në shtator 2025. Hoti vlerësoi se rezultati i zgjedhjeve të fundit pasqyron mungesën e një politike me vizion dhe guxim politik.

Burim: RTV21
— Redaksia ZHURMA