Hoti kërkon rregullim ligjor për Deklaratën e Pavarësisë dhe portretin e Rugovës

Deputeti Avdullah Hoti ka kërkuar që vendosja dhe respektimi i Deklaratës së Pavarësisë dhe portretit të presidentit Ibrahim Rugova të rregullohen shprehimisht me ligj. Sipas tij, këto dy elemente përfaqësojnë themelet e shtetit të Kosovës dhe nuk duhet të trajtohen si pjesë dekorative që varen nga preferencat individuale. «Deklarata e Pavarësisë dhe portreti i Presidentit Rugova nuk janë dekor që vendoset e hiqet sipas shijeve. Ato simbolizojnë themelet mbi të cilat qëndron Republika e Kosovës», ka shkruar Hoti përmes një postimi.

Hoti ka theksuar se mënyra e prezantimit dhe respektimit të tyre nuk mund të mbetet në diskrecionin e zyrtarëve publikë, duke kërkuar ndërhyrje legjislative për të shmangur ndryshimet arbitrare. «Respektimi i simboleve shtetërore dhe protokollit shtetëror nuk është në diskrecionin e asnjë zyrtari shtetëror», ka deklaruar ai, duke shtuar se është e domosdoshme që kjo çështje të përcaktohet me ligjin që rregullon protokollin e simboleve shtetërore.