Haxhiu takon drejtorin e IRI-së për bashkëpunimin parlamentar

Kryeparlamentarja Albulena Haxhiu ka pritur në takim drejtorin e lartë për Evropë dhe Euroazi në Institutin Republikan Ndërkombëtar, Stephen B. Nix, me të cilin ka diskutuar rreth zhvillimeve politike dhe parlamentare në vend. Sipas njoftimit të saj në rrjetin social “Facebook”, gjatë takimit është biseduar për punën e Kuvendit, prioritetet legjislative, mbikëqyrjen parlamentare dhe rëndësinë e dialogut e të bashkëpunimit ndërmjet grupeve parlamentare. «Diskutuam për prioritetet legjislative, mbikëqyrjen parlamentare dhe rëndësinë e dialogut e të bashkëpunimit ndërmjet grupeve parlamentare», ka theksuar Haxhiu. Po ashtu, palët kanë shkëmbyer pikëpamje lidhur me zhvillimet politike në Ballkanin Perëndimor, sfidat rajonale dhe domosdoshmërinë e ruajtjes së stabilitetit. Në përmbyllje të takimit, Haxhiu ka vlerësuar lart kontributin ndër vite të institutit amerikan në zhvillimin e demokracisë në Kosovë, duke shprehur gatishmërinë e plotë për zgjerimin e mëtejshëm të bashkëpunimit të ndërsjellë në forcimin e kapaciteteve parlamentare.