Haxhiu dekoron me "Urdhrin e Lirisë" komandant Adem Shehin

PRISHTINË — Ushtruesja e detyrës së presidentes, Albulena Haxhiu, dekoroi sot me medaljen “Urdhri i Lirisë” komandantin Adem Shehi. Ky i fundit, nga Farka e Tiranës, iu bashkua radhëve të Ushtrisë Çlirimtare të Kosovës në kohën kur ushtria kishte nevojë për burra trima që e kuptonin peshën e detyrës.

Haxhiu tha se Shehi solli me vete dijen e oficerit, përvojën e ushtrisë dhe seriozitetin e nevojshëm. Para se të hynte drejtpërdrejt në luftë, ai ndihmoi në organizimin dhe stërvitjen e qindra vullnetarëve e ushtarëve të UÇK-së, duke i kthyer ata në luftëtarë të përgatitur.

Më pas, Shehi shërbeu si komandant i Brigadës 153 “Hyzri Talla” në Zonën Operative të Llapit. Në këtë pozitë, ai u bë pjesë e rëndësishme e forcimit të njësive ushtarake që vepronin në Llap dhe Gollak, duke vendosur rend dhe qëndresë te luftëtarët.

Sipas Haxhiut, si shumë oficerë e vullnetarë nga Shqipëria, ai e dinte se kur Kosova ishte në rrezik, kufiri nuk mund të ishte arsyetim për të qëndruar larg. Ky nderim vjen për shërbimin e tij, dijen e vënë në punë dhe rrezikun e marrë përsipër.

Në Ditën e Çlirimit, udhëheqësja shprehu mirënjohje të thellë për komandantin dhe të gjithë ata që i dhanë Kosovës dije, armë, besë dhe jetë në orët e saj të vështira.

Burim: IndeksOnline
— Redaksia ZHURMA