Pse Kosova s'guxon të mbetet jashtë projektit të gazit amerikan?

PRISHTINË — Profesori i marrëdhënieve ndërkombëtare, Enver Hasani, shprehu shqetësim për qasjen e institucioneve të Kosovës ndaj projekteve energjetike me mbështetje amerikane. Ai paralajmëroi se vendi nuk duhet të izolohet nga zhvillimet strategjike që lidhen me politikën energjetike të Shteteve të Bashkuara në Ballkan.

Në emisionin “Intervista e Javës” në KosovaPress, Hasani theksoi se gazi amerikan është pjesë e një strategjie të gjerë gjeopolitike globale. Sipas tij, vendimet për furnizimin energjetik nuk mund të jenë çështje e interesave partiake të pushtetit, pasi ato përcaktojnë orientimin strategjik të shtetit.

Hasani kritikoi qeverinë për rezerva ndaj politikës së jashtme amerikane, duke përmendur mospajtimet edhe me administratën Biden. Sipas tij, këto qëndrime e ofrojnë Kosovën afër vendeve me politika antiamerikane, gjë që ka ndezur dritat e kuqe të alarmit diplomatik.

Sa i përket alternativave, Hasani pyeti se pse duhet hezituar për gazin nga Maqedonia e Veriut, i cili është fizikisht më afër. Nëse pranohet marrja e gazit nga Vlora e Shqipërisë, refuzimi i lidhjes më të afërt gjeografike mbetet i pashpjegueshëm.

Profesori i së drejtës kritikoi ashpër edhe planet e kryeministrit në detyrë, Albin Kurti, për gazifikimin e qymyrit. Ai ngriti dyshime mjedisore, duke pyetur se si mund të arsyetohet ky proces i dëmshëm kur më herët janë refuzuar projekte të tjera pikërisht për shkaqe ekologjike.

Në aspektin ekonomik, Hasani paralajmëroi se zvarritja e projekteve do t'i kushtojë shtrenjtë buxhetit. Pritja prej 10 deri në 15 vitesh për gazifikimin e linjitit do ta detyrojë Kosovën të blejë rrymë çdo dy-tri vite në vlerë prej 1 deri në 2 miliardë euro.

Së fundmi, ai trajtoi vjedhjen e rrymës si një problem të pastër penal, ndjekja e të cilit vështirësohet nga shtrirja e provave në Serbi, Bosnjë e Mal të Zi. Mungesa e bashkëpunimit rajonal me këto shtete e bën pothuajse të pamundur mbledhjen e dëshmive.

Debati rikthehet pas thirrjeve të të ngarkuarës me punë të SHBA-së, Anu Prattipati, që Kosova t'i bashkohet projektit të gazit, vite pasi qeveria hoqi dorë nga MCC. Kurti deklaroi se mbetet i interesuar për gazin përmes Vlorës dhe gazifikimit të linjitit.

Burim: Gazeta Express
— Redaksia ZHURMA