Si u fshinë grafite nacionaliste në qendër të Beogradit?

BEOGRAD — Mesazhi "Kosova është zemra e Serbisë" është shkruar në fasadën e një ndërtese në zonën kryesore të këmbësorëve në Beograd, ku çdo ditë kalojnë mijëra turistë. Ky slogan nacionalist, që mohon pavarësinë e Kosovës të shpallur në vitin 2008, zëvendësoi një grafit që mohonte gjenocidin ndaj boshnjakëve në Srebrenicë, i cili ndodhej aty që nga qershori 2024.

Grafiti i mëparshëm, autor i të cilit ishte grupi ultradjathtist "Patrulla Popullore", u fshi disa herë nga aktivistët e organizatës joqeveritare "KROKODIL". Pas aksionit të fundit të tyre, në fasadë u shfaq mesazhi për Kosovën, kësaj radhe pa asnjë nënshkrim organizativ. Filip Jovanoviq, aktivist 23-vjeçar i "KROKODIL"-it që ka marrë pjesë në rreth njëzet aksione, thotë se grafiteve u janë vendosur edhe copa teli me gjemba për të penguar pastrimin.

Rreth njëqind metra larg, në rrugën "Sremska", aktivistët mbuluan në mes të majit grafitin "Kur ushtria të kthehet në Kosovë" — slogan që është shfaqur në gjithë Serbinë që nga më shumë se tre vjet më parë. Policia dhe ushtria serbe u tërhoqën nga Kosova në vitin 1999 pas Marrëveshjes së Kumanovës.

Administrata e Qytetit të Beogradit dhe Inspektorati Komunal nuk iu përgjigjën pyetjeve të Radios Evropa e Lirë as për fshirjen e grafitit për Kosovën, as për numrin e kallëzimeve kundër autorëve të tyre në pesë vjetët e fundit. Ndërkohë, policia komunale ka nisur procedura kundër vetë aktivistëve që i mbulojnë grafite, ndonëse Gjykata për Kundërvajtje në Beograd ka shqiptuar vendime lirimi për ta. Jovanoviq pretendon se shkrimtarët e grafiteve "kanë mbrojtje nga policia" dhe nuk ndëshkohen edhe kur veprojnë në mes të ditës.

Përfaqësues të Partisë Përparimtare Serbe në pushtet, përfshirë kryetarin Millosh Vuçeviq, i kanë kritikuar aktivistët duke i akuzuar se "urrejnë gjithçka që është serbe".

Burim: Telegrafi
— Redaksia ZHURMA