Gola: S’patëm kuorum për mbledhjen e Kryesisë së Kuvendit
Mbledhja e Kryesisë së Kuvendit të Kosovës ka dështuar për shkak të mungesës së kuorumit, ndërsa grupet parlamentare kërkojnë qartësi për seancat.
Redaksia ZHURMA · · Përditësuar · 2 min lexim
Mbledhja e Kryesisë së Kuvendit të Kosovës ka dështuar të mbahet për shkak të mungesës së kuorumit. Nënkryetari i Kuvendit nga Lëvizja Vetëvendosje, Ardian Gola, tha para gazetarëve se nuk kishte numër të mjaftueshëm të anëtarëve dhe se nuk u përmbushën kushtet. «Fatkeqësisht, as sot, as dje nuk patëm kuorum, dhe nuk u përmbushën kushtet për mbledhjen e Kryesisë», deklaroi Gola, duke shtuar se do të shihet në ditët në vijim nëse do të ketë kuorum.
Shefi i Grupit Parlamentar të AAK-së, Besnik Tahiri, kërkoi që seanca të vazhdojë, duke theksuar se zhagitja nuk i bën nder Kuvendit dhe se dekreti i presidentes lidhur me Ligjin për Dhomat e Specializuara duhet të kthehet në Kuvend. Çështja e kthimit të këtij ligji ishte vendosur më parë si pikë e fundit e rendit të ditës, por kishte mbetur pa u trajtuar pasi seanca ishte mbyllur në mungesë kuorumi pas debatit për energjinë elektrike.
Lidhur me vazhdimin e asaj seance, Gola tha se mbetet që shefat e grupeve parlamentare të dakordohen, ndërsa rendi i ditës për mbledhjet parashikonte gjithashtu shqyrtimin e projektligjeve për buxhetin, efiçiencën e energjisë dhe trashëgiminë kulturore.
Lexo edhe
Më shumë →Koleksione · të dhëna të verifikuara
Vazhdo me më të lexuarat sot
Përditësuar