GJYNN kthen hitet e vjetra në Afro House me inteligjencë artificiale
Krijuesi nga Gjilani, i cili jeton në Luzern të Zvicrës, bashkëpunon me tekstshkruesin KANN për projektet e tij të reja në rrymat Afro House dhe Deep House.
GJILAN — Artisti shqiptar Gjyni Novorberdaliu, i njohur si GJYNN, është krijuesi i parë shqiptar që përdor inteligjencën artificiale për muzikë dhe spote. Ai po merr hitet e vjetra patriotike e baladat shqiptare për t'i kthyer në versione moderne.
Novorberdaliu, me prejardhje nga Gjilani, jeton dhe vepron në Luzern të Zvicrës. Ai ka punuar më herët në studio muzikore, por zhvillimi i industrisë së inteligjencës artificiale e ka shtyrë atë të eksperimentojë me këtë teknologji për të sjellë projekte të veçanta.
Projektet e tij nuk ngjasojnë me krijimet e thjeshta të inteligjencës artificiale që dëgjohen sot. Artisti i transformon këngët e vjetra në zhanret Afro House dhe Deep House, duke u dhënë atyre një ritëm krejtësisht modern dhe mjaft të pëlqyer.
Në këtë rrugëtim të ri, GJYNN po bashkëpunon për tekstet me një artist të ri që quhet KANN. Përveç kësaj, ai krijon beata dhe skena për videoklipe për artistë të tjerë të estradës, të cilat nuk mund të realizohen me kamera të thjeshta.
I apasionuar pas muzikës që herët, ai synon të sjellë këngë që do të dëgjohen gjithmonë. Përmes kësaj pune, ai kërkon të mbetet i pari artist shqiptar që krijon këngë me inteligjencë artificiale, duke u hapur rrugë edhe krijuesve të tjerë.
Burim: RTV21
— Redaksia ZHURMA