Pse Gjykata Speciale nuk tregon nëse Thaçi e Veseli votuan?
Prokuroria e Specializuar konfirmon se u morën masa për votim, por e quan 'çështje private' nëse paraburgosurit e përdorën të drejtën.
HAGË — Prokuroria e Specializuar e Gjykatës Speciale ka refuzuar të konfirmojë nëse Hashim Thaçi, Kadri Veseli, Jakup Krasniqi dhe Rexhep Selimi kanë votuar në zgjedhjet e 7 qershorit, pavarësisht se të katër po mbahen në paraburgim në Hagë.
Në një përgjigje për media, Prokuroria deklaroi se "u morën të gjitha masat që të paraburgosurit të mund të ushtronin të drejtat e tyre qytetare si qytetarë të Kosovës për të votuar në zgjedhjet parlamentare". Megjithatë, shtoi se "nëse të paraburgosurit kanë vendosur të votojnë, kjo është çështje e tyre private dhe si e tillë nuk mund të komentojmë për të".
Zgjedhjet e parakohshme për Kuvend të Kosovës u mbajtën dje me pjesëmarrje prej 722.842 votuesish brenda vendit, ose 36,88% të listës zgjedhore. Rreth 100 mijë mërgimtarë votuan përmes postës ose në përfaqësi diplomatike, ndërsa numërimi i votave me kusht dhe të diasporës pritet të fillojë sot.
Sipas rezultateve paraprake të KQZ-së, LVV-ja kryeson me 42,91%, ndjekur nga PDK-ja me 21,12%, LDK-ja me 17,58% dhe AAK-ja me 7,16%.
Burim: Zëri
— Redaksia ZHURMA