Gjykata liron dy protestuesit e arrestuar
Orion Peçi dhe Artemisa Islamaj ishin arrestuar pas protestës së të premtes para Parlamentin
TIRANË — Gjykata e Tiranës vendosi t’u ndalojë daljen jashtë shtetit dy protestuesve të arrestuar, Orion Peçi dhe Artemisa Islamaj. Gjyqtarja lë në fuqi kërkesën e prokurorisë.
Mbi ta rëndojnë akuzat, kundërshtimi i forcave të policisë dhe prishja e qetësisë publike. Peçi dhe Islamaj u arrestuan pas protestës së të premtes para Parlamentit, ku gjithashtu u proceduan në gjendje të lirë 30 persona të tjerë.
Policia deklaroi se në një qese që mbante Islamaj u sekuestruan kapsolla. Ndërkohë, qindra qytetarë janë mbledhur mesditën e kësaj të hëne para komisariatit nr.1 në Tiranë duke kërkuar lirimin e protestuesve të arrestuar gjatë protestës së sotme para Kuvendit.
Me thirrjet “lironi shqipet”, qytetarët kërkuan që policia të mos mbante në qeli qytetarë të cilët sipas tyre nuk kanë bërë asnjë veprim të dhunshëm. Mes të arrestuarve është edhe Arben Kola, njëri prej organizatorëve të protestës.
Burim: Gazeta Si, https://gazetasi.al/gjykata-vendos-ndalimin-per-dalje-jashte-shtetit-per-dy-protestues-te-arrestuar/
— Redaksia ZHURMA