Gjykata lejon hapjen e 3 iPhone-ve për vjedhjen e 700 milionë lekëve

DURRËS — Gjykata e Durrësit ka miratuar kërkesën e prokurorisë për të lejuar kontrollin dhe ekzaminimin e tre aparateve telefonikë të sekuestruar nga tre zyrtare të Postës Shqiptare. Vendimi vjen në kuadër të hetimeve për vjedhjen e rreth 700 milionë lekëve të destinuara për pensionet në këtë degë.

Sipas vendimit, Policia Gjyqësore, me praninë e një eksperti kibernetik, do të hyjë në dy aparate Iphone 17 dhe një Iphone 13. Këto pajisje u përkasin shtetaseve Elisabeta Malaj, Paola Dana dhe Valbona Duni, të cilat po procedohen nën akuzën e vjedhjes duke shpërdoruar detyrën.

Hetuesit synojnë që përmes bisedave, listave të thirrjeve dhe të dhënave të ruajtura në memorien e telefonave ose në llogaritë iCloud të zbardhin dinamikën e krimit. Prokuroria shpreson të zbulojë gjithashtu nëse ka persona të tjerë të përfshirë në këtë abuzim, brenda ose jashtë institucionit.

Dosja tregon se hetimi nisi pas një kallëzimi penal të depozituar nga Posta Shqiptare më 14 korrik 2026. Filiali i Durrësit nuk po transferonte fondet e duhura drejt Drejtorisë së Përgjithshme, duke krijuar mospërputhje negative në regjistrat e llogarive kontabël të kësaj të fundit.

Për të kryer verifikimet, më 9 korrik ishte ngritur një grup pune nga Drejtoria e Përgjithshme. Kontrolli i ushtruar në zyrat e Durrësit zbuloi se gjatë muajve prill dhe maj ishin prerë mandate pagesash nga arka qendrore, të cilat u regjistruan në mënyrë të parregullt në sistem.

Mandatet ishin prerë në favor të degëve në Shijak dhe Krujë, duke pakësuar gjendjen fizike të arkës në Durrës. Megjithatë, këto shuma nuk u regjistruan asnjëherë si hyrje në degët pritëse, duke krijuar një diferencë të pajustifikuar financiare prej rreth 69 milionë lekësh të reja.

Kamerat e sigurisë konfirmuan se lëvizjet monetare ishin bërë në kundërshtim me rregullat e Postës Shqiptare. Pamjet filmike të administruara si provë tregojnë veprimet abuzive të punonjësve të përfshirë në këtë skemë, çka solli dyshime të forta për konsumimin e veprave penale në Durrës.

Burim: Syri.net
— Redaksia ZHURMA