GJKKO dënon me 1 vit e 4 muaj burg ish-kryebashkiakun e Memaliajt
Gjykata e Posaçme ka shpallur fajtor ish-kryebashkiakun e Memaliajt, Gjolek Guci, dhe ish-nënkryetaren Edmonda Harizi për shkelje të barazisë në tendera.
Redaksia ZHURMA · · 2 min lexim
Gjykata e Posaçme kundër Korrupsionit dhe Krimit të Organizuar ka dënuar me 1 vit e 4 muaj burg ish-kryebashkiakun e Memaliajt, Gjolek Guci, pasi e ka shpallur fajtor për veprën penale të shkeljes së barazisë së pjesëmarrësve në tendera publikë, të kryer në bashkëpunim. Vendimi u shpall nga trupa gjykuese e përbërë nga gjyqtaret Flora Hajredinaj, Etleva Deda dhe Engjëllushe Tahiri. Gucit iu caktua fillimisht një dënim prej 2 vitesh burg, por përfitoi uljen me një të tretën për shkak të gjykimit të shkurtuar. Gjykata vendosi gjithashtu t'i heqë atij të drejtën për të ushtruar funksione publike për një periudhë pesëvjeçare.
Në të njëjtën çështje, e cila lidhet me procedurën e prokurimit të vitit 2021 për ndërtimin e Ujësjellësit Rajonal me fond të parashikuar 493.183.572 lekë ose rreth 4.1 milionë euro, u dënua edhe ish-nënkryetarja e bashkisë, Edmonda Harizi. Ajo u shpall fajtore për të njëjtën vepër penale, duke u dënuar fillimisht me 1 vit burg, ndërsa pas aplikimit të gjykimit të shkurtuar dënimi përfundimtar u reduktua në 8 muaj burg, krahas heqjes së së drejtës për të ushtruar funksione publike për pesë vite. Sipas hetimeve të Prokurorisë së Posaçme, çështja e tenderit përfshinte parregullsi në dokumentacionin e operatorëve fitues dhe lidhje interesi me kompaninë që kishte dhuruar projektin e ujësjellësit. Vendimi i GJKKO-së mund të ankimohet në Gjykatën e Posaçme të Apelit brenda 15 ditëve nga dita e nesërme e njoftimit të tij.
Lexo edhe
Më shumë →Koleksione · të dhëna të verifikuara
Vazhdo me më të lexuarat sot
Përditësuar