Gjermania dhe Franca synojnë Botërorin — kandidaturë e përbashkët për 2038 ose 2042
Gazeta prestigjioze "Le Parisien" raporton se të dyja vendet janë të gatshme të bashkëpunojnë për turneun që pritet të ketë 64 skuadra.
PARIS — Gjermania dhe Franca po shqyrtojnë mundësinë e shpalljes së një kandidature të përbashkët për të organizuar Kampionatin Botëror të futbollit në vitin 2038 ose 2042. Siç raporton gazeta franceze "Le Parisien", të dyja vendet janë të gatshme të bashkëpunojnë për mikpritjen e këtij eventi të rëndësishëm.
Ky organizim vlerësohet si një mundësi e shkëlqyer, pasi konsiderohet jo vetëm prestigjioz, por edhe shumë fitimprurës për shtetet pritëse. Sipas planeve aktuale, Botërorët pritet të luhen me pjesëmarrjen e 64 skuadrave, çka e bën mbajtjen e finaleve në dy apo tri vende të ndryshme si zgjidhjen më logjike.
Në këtë drejtim, si Gjermania ashtu edhe Franca synojnë të kenë një avantazh të hershëm strategjik. Duke filluar që tani përgatitjet për kandidaturën e tyre të përbashkët, të dyja shtetet kërkojnë të pozicionohen sa më mirë për turnetë e ardhshëm që ende nuk kanë një vend organizator të përcaktuar.
Burim: Gazeta Tema
— Redaksia ZHURMA